( مازالك خلقتي إلي )
قبل الصمت مَ يخم ع لسان الدجل
أو يهتري الموال ويصدّي الغِني
وقبل اليأس مَ يفوت من باب الملل
ونهر الحقيقة يجف تبكي السوسني
والعندليب يهاجر يموت الحجل
وتبقي ع خمر الآخ متلي مدمني
وقبل الفرح ما يخلص ينخ الجمل
وحزن البشر مَ يصير علّة مزمني
رح إستغل الوقت برّات الخجل
تا خبرك بالشوق إني ها السني
زرعتلّك بحقل الزجل قمح الغزل
انشالله السني بيكون هالموسم جني
ونحصد بمنجل حب بستان الأمل
والملتقى عا بيدر الحلم الهني
مازالك خلقتي إلي منذو الأزل
بقينا سوا من وقت عهد الولدني
كل ما غفي قلب العشق رح فيّقو
وإنتي معي دخلك شو فيها هالدني ؟ .
د. عيسى فضة
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.