آااااه يا ميمه !!!
كنت مفكّر حالي جبَل
وما في قوّة بتهزّني ..
وقت الْ غبْتِ عنّي يا أمّي
شوقي لْحضنك دمّرني !!!
يا الله شو طلعت صغير ..
قدّام إحساسِك الكبير ...
سامحيني عا كل تقصير ..
وغلطاتي الْ طلعتْ منّي !!!
ربّنا عطاكِ من حنّيتو
وخلاك أعظم مخلوق ..
لمّن عطرِكْ ما شمّيتو
حسّيت بحالي مخنوق !!!
يا أمي يا ستُ الكلّ
مِن بعدِكْ عم دوق الذلّ ..
حبّك والله روحي احتلّ
ووحدو وجودِك بيعزّني !!!
طلّي عليّي يا أمي شوي
وخلّيني بحضنك اغفى ...
ضاق الكون بوسعو بنظري
وما عندي غيرك أوفى !!!
يا جنّة الله عَ الأرض ..
حُبّك والله سنّة وفرض ..
أصابيعي عم عضّن عَضّ
عَ لحظة زعلتِ منّي !!!
عامر ...
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.