فكرت ارسم
للشاعر/ محمد الشريف
.............................................
فكرت مرة أحاول أرسم بالكلام
أحلام جميلة وقلب خالي م الخصام
قلمي قلِّي هترسم إيه
وانت أصلا بالرسم جاهل
وكل مرة بتقول د ساهل
مبيتسمعشي ولا له آذان
قلت اخرس وبلاش مراوغة
هارسم صبية مستحية
هارسم سحابة بترش مية
تمطر سعادة وقلوب نقية
هارسم بنات حلوة وبهية
جمال طبيعي يسعد بطلَّة
والرمش ليل
والقلب ضلة
والظُّرف عادة
مهوش رزية
هارسم كمان وردة رقيقة بتفوح أمان
.............................................
قلمي قلي كفاية دوشة
د انت عايش ف الخيال
الناس في حال وانت في حال
بطل معاندة وخليك شجاع
د انت يا صاحبي جايب صداع
خلتني ارسم أيام زمان
د كله وهم ومن الخيال
والله حرام
معدشي حاجة تديك حنان
الوش بوهية والرمش زيف
والطلة كدبة
وفيها طيف
شيطان بينشر
كلام لطيف
والقلب أسود
والشعر ليف
والكعب عالي
وليه رنين
بيقول تعالوا
نشوف دا مين
الحلو عدا
ورح يرمي وردة
والكل يرضة
ويملي عينيه
فاهم يا بيه
عيشلك يومين دالعمر ولي ف الأوهام
.............................................
وده اللي ماشي
خليك فهيم
اكتب كلام
مهوش حكيم
يجيب فلوس
يرقّص صبايا
ويسطل تيوس
قلت اخرس بلاش تكمل
قلم رخيص والله عيل
هعيش زمان واغني كمان
هو اللي فاضل د انا فنان
ولازم ارسم كلام تمام
هارسم حصان
واولاد حارتنا
وقفين طابور
بيحيوا علم
حوليه زهور
هرسم شمعة مليانة نور
تمحي ظلامنا
ومتور يدور
وجندي أسمر
واقف شديد
قلبه جامد
زي الحديد
هارسم كلام
كلامي صادق زي الحسام
يحي النفوس
ويصحي الايمان
وبلاها دنيا
دي مال حرام
هارجع اسبح ف الأحلام
اعيش واحيا ف ايام زمان
الدنيا تحلي بأخلاق زمان
والأصل يفضل ف الإيمان
الكلمة أبقي من الفلوس
ترطب قلوبنا وتحيي النفوس
قيمة عالية تصنع ولادنا
تنشر محبة وبلاها الفلوس
ايه يا قلمي فهمت يا ابني
بلاش ترد واتعاندني
تعالي نبني أحلام بلادنا
وانربي بناتا ونهدي ولادنا
بأحلي كلام
وده أعلي وسام
بقلمي /محمد الشريف ...من ديوان (راجع أغني)
