/ صرخة المحزون / بقلم الشاعر الكبير الدكتور [ عيسى فضة ]

 

عيسى فضة

 

 · ساعة واحدة

 

 · 

/ صرخة المحزون /

اعطيني حزن هالأرض لا تخافي

قلبي قسي ومحروق سلّافي

والعيد جاييني السني بلا راس

راس الفرح مقتول ع كتافي

يا هالدني من بين كل الناس

بجنون صرتي تخزّقي لحافي

وتخمّري دمّي ودموعي بكاس

واشرب وجع هالكون ع الصافي

وصرتي بقساوة تقتلي الإحساس

صار الصمت محجور ع شفافي

بين الفزع والجوع والوسواس

بموّن قهر مونة عمر كافي

تحت الدعس صار الورد ينداس

الوقت خرفان ماشي ع الحوافي

متل الحرامي فات ع القدّاس

سرق أحلامنا وكل العوافي

في ناس ملّوا من الدهب والماس

وفي ناس ما عندن دوا شافي

يا عيد سجّل هالحكي الحسّاس

ما في عدالة بهالدني ما في

صار العشق متل الزرع بيباس

وبين الكورونا والفساد اليوم

في عجقة موت ع بواب المشافي .

د. عيسى فضة

عرض الرؤى

معدل وصول المنشور: ٣٤

٢Ikbal Al Safadi وشخص آخر

تعليق واحد

أعجبني

تعليق