زجل مغربي بعنوان
الدنيا خداعة..........
آاااش بغيتي مني يا لحزان..
علاش خديتي صدري وطان..
و التنهيدة ليك عنوان..
الخد تجرح دبالو لجفان..
كفاك هموم يا ساكن ليسار..
هون عليك وعليا كون صبار..
لا أنا و لا نتا نغيرو لقدار..
صبر وكابر يا قلبي هذا كلام العقال..
الدنيا غير قنطرة ما فيها أمان..
مرة تضحك ليك ومرة تزلزلك زلزال..
تبان ليك صينية وزينوها كواب البلار..
لكن كيسانها مرة عسل و مرة حنظل قتال..
تعلمي يا عيني تشوفي كل لوان..
وتعلم يا حلقي تتجرع لحلو ومر الكيسان..
الدنيا ظلامة خذ العبرة يا إنسان..
يلا بغاتك تحوزك لصدرها وتعطيك بلحفان..
ويلا كرهاتك تقطع السلاسل وتخليك في همها حيران..
بحالها بحال الناس والحوال..
شحال من غريب يخفف عليك لثقال..
وشحال من قريب ينسالك البر ولحسان..
يا حسرة كلشي تقلبت فيه لوزان..
الحلال عاد صعيب ومولاه منبع الهبال..
قالو سوقو خاوي وراسو ما يعرف تخمام..
أما الحرام داروه عريس يحنيولو اليدين وترقصلو القدام..
بقلمي سعاد مبتهج.
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.