( الخريف ) شعر محكي
لمّا خُطاكْ بتوصلْ لْ/باب الخريفْ
وبتلمعْ الأحداقْ
بتتأمّلْ بلون الشجر والعري كِيفْ
عم تسقط الأوراقْ
والريح هيصة وجلجلة وصوتْ وحفيفْ
والبردْ ما بينطاقْ
بتقشع طبيعة دخلتْ بطقس النزيفْ
والتعبْ والإرهاقْ
وصفّا مِزاجا أخوتْ وعقلا خفيفْ
وما عاد حلما راقْ
وسادْ المكان الصَلَفْ والطبعْ العنيفْ
واسودّتْ الآفاقْ
ولولا تفكّرْ بالدني العقل النضيفْ
وشاف الزمن أفّاقْ
بيقول غادرنا الحلا وأنسْ المَصيفْ
طبع الزمانْ فراقْ
مافي ظرفْ عاطول بيضلّو أليفْ
ولا حالْ عا الإطلاقْ
بيكفيكْ يا إنسانْ تا تحيا رغيفْ
لا تكدّس الأرزاقْ
من العيب بطنكْ مُتخمْ وقصرك وريفْ
وجيرانكْ بإملاقْ
وتمشي بطيلسْ أبيض مرفرف هفيفْ
وغيركْ ما عندو خْلاقْ
من واجبك ما ترتضي للناس حيفْ
لو تنصفْ الأخلاقْ
مادامْ عزّ ب/هالدني وما دامْ كَيفْ
عشقْ الدني أشواقْ
ما في زنيمْ المَحتَدْ وما في شريفْ
عريانْ مولودْ الدني وعريانْ
بالآخرة بيقابلْْ الخلّاقْ
شعر: بسام الأسبر 7/11/2020
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.