نزوة !!!
لمّن تشتاق لي بتصير
حسّون وصَوتك دافي ...
بتّرغلْ أحلى التعابير
وأوّلهم متلي ما في !!!
ولمّن تقطفني بتطير
وبترفرف فوق كتافي ...
وبتنسى كلّ اللي قلت
وشو تغنّيتْ بأوصافي !!!
ولو قلتلّكْ وين الحُبّ
وليش هلأ صرت تجافي ..
بتقلّي صار ظرفي صعبْ
ومش قادر حُبِّكْ كافي !!!
وبتصير تتشكّى عَ الفقر
الْ ما خلّى الْ بينّا صافي ..
وتختمها صار لازم مدّ
اجريي عَ قد لحافي !!!
وين كان هالمنطِق يا شَبّ
اللي اجيتني تهرول حافي ؟
ع غفلة صار ظرفك صَعبْ
ومنحوس وحظكْ طافي !!!
ما في داعي ترمي أعذار
طول عمرك كذبك وافي ...
الله يوجّع كلّ غدّار
وما يلاقي لوجعو شافي !!!
عامر ...
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.