/ وين الغلط /
مجنون يحكي وعاقل بيسمع إلو
بآخر وقت مجهول مدري بأولو
مدري كلامو كان ع قياس الخريف
مدري الربيع الأصفر العم يغزلو
ويمكن حكي ملغوم بالشكل اللطيف
وين الغلط مازال مقطوع الدلو
والمي زربت والملح عاف الرغيف
ويللي بقوا من فوق مش عم ينزلو
قال الوقت مجروح في عندو نزيف
وبعدو الدوا مفقود واقف معملو
وهاك المضافة مدمرة مات المضيف
مفاتيحها عم يهتروا ويتخللو
وقال البقاء بيرفض وجود الضعيف
وإلّا القوي عنو البشر ما بيسألو
وبيجوز هالعاقل متل لص الظريف
ما بيسمع وعندو السمع واطي خفيف
وبيكون هالمجنون عم يحكي حلو .
د. عيسى فضة
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.